சிறைச்சாலையில் உள்ள கலபொடஅத்தே ஞானசார தேரருக்கு ஜனாதிபதி பொதுமன்னிப்பு வழங்கி விடுவிக்கக் கோரி 50 லட்சம் கையொப்பங்களைப் பெற்றுக்கொள்ளும் மக்கள் கையெழுத்துப் பிரசார நடவடிக்கை இன்று (09.10.2026) தென் மாகாணத்தை மையமாகக் கொண்டு ஆரம்பிக்கப்பட்டுள்ளது.
தித்தகல்லே ஆனந்தசிரி தேரர் தலைமையிலான மகா சங்கத்தினரால் ஆரம்பிக்கப்பட்டுள்ள இந்தக் கையொப்ப மனு, பின்னர் ஜனாதிபதியிடம் கையளிக்கப்படவுள்ளது.
இதற்கமைய, இன்று காலை மகா சங்கத்தினர் முதற்கட்டமாக தெவினுவர ஸ்ரீ விஷ்ணு தேவாலயத்திற்குச் சென்று விசேட வழிபாடுகளை மேற்கொண்டதுடன், அதனைத் தொடர்ந்து கையெழுத்துச் சேகரிக்கும் பணியைத் தொடங்கினர்.
இன்றைய நாள் முழுவதும் தெவினுவர, மாத்தறை, வெலிகம, ஹபராதுவ மற்றும் காலி ஆகிய நகரங்களில் இந்தக் கையொப்பங்கள் பெறப்படவுள்ளதுடன், நாளை (10.10.2026) கொழும்பு மாவட்டத்தை மையமாகக் கொண்டு இந்தத் திட்டம் முன்னெடுக்கப்படவுள்ளதாக தித்தகல்லே ஆனந்தசிரி தேரர் தெரிவித்துள்ளார்.
