👉 அல்கோரிதம் அம்பலமாகிறது! எக்ஸ் தளத்தில் எலான் மஸ்க் அதிரடி மாற்றம்

எலான் மஸ்க் தலைமையிலான சமூக ஊடக தளமான எக்ஸ் தளம் தனது புதிய அல்கோரிதத்தை எதிர்வரும் ஏழு நாட்களுக்குள் பொதுமக்களுக்கு திறந்துவிடவுள்ளதாக எலான் மஸ்க் அறிவித்துள்ளார்.

இயற்கை பதிவுகள் மற்றும் விளம்பர பதிவுகள் எவ்வாறு பரிந்துரைக்கப்படுகின்றன என்பதற்கான முழுமையான குறியீடுகள் இதில் இடம்பெறும் என அவர் தெரிவித்துள்ளார்.

மேலும், இவ்வாறு அல்கோரிதத்தை பொதுமக்களுக்கு திறந்துவிடும் நடவடிக்கை ஒவ்வொரு நான்கு வாரங்களுக்கும் ஒருமுறை மேற்கொள்ளப்படும் என்றும், அதில் செய்யப்பட்ட மாற்றங்களை விளக்கும் விரிவான டெவலப்பர் குறிப்புகளும் வெளியிடப்படும் என்றும் எலான் மஸ்க் தனது எக்ஸ் பதிவில் குறிப்பிட்டுள்ளார்.

இதற்கிடையில், எக்ஸ் தளத்தின் அல்கோரிதம் மற்றும் சட்டவிரோத உள்ளடக்கங்கள் பரவுவது தொடர்பாக கடந்த ஆண்டு விதிக்கப்பட்டிருந்த கண்காணிப்பு உத்தரவை, 2026ஆம் ஆண்டு இறுதிவரை நீட்டிக்க ஐரோப்பிய ஆணைக்குழு தீர்மானித்துள்ளதாக அதன் பேச்சாளர் தோமஸ் ரெஞ்ஞியே தெரிவித்துள்ளார்.

மேலும், 2025ஆம் ஆண்டு ஜூலை மாதத்தில், அல்கோரிதம் சார்ந்த பாகுபாடு மற்றும் மோசடியான தரவுச் சேகரிப்பு குற்றச்சாட்டுகள் தொடர்பாக, பாரிஸ் அரசுத் தரப்பு எக்ஸ் தளத்தின் மீது விசாரணைகளை ஆரம்பித்திருந்தது.

இந்த விசாரணையை, பயனர்களின் கருத்துச் சுதந்திரத்துக்கு அச்சுறுத்தலாக உள்ள அரசியல் நோக்கமுடைய குற்ற விசாரணை என எக்ஸ் நிறுவனம் தெரிவித்திருந்தது.

இதனிடையே, கடந்த மாதம், ஐரோப்பிய ஒன்றியம் எக்ஸ் தளத்திற்கு 120 மில்லியன் யூரோ அபராதம் விதித்தது.

டிஜிட்டல் சேவைகள் சட்டத்தின் கீழ் விதிக்கப்பட்டுள்ள வெளிப்படைத்தன்மை கடமைகளை எக்ஸ் நிறுவனம் மீறியதாக கட்டுப்படுத்தும் அதிகாரிகள் தெரிவித்துள்ளனர்.

இந்த அபராதம், எக்ஸ் தளத்தின் ‘ப்ளூ செக் மார்க்’ சந்தா திட்டம், விளம்பர களஞ்சியத்தின் வெளிப்படைத்தன்மை குறைவு மற்றும் ஆராய்ச்சியாளர்களுக்கு பொது தரவுகளுக்கான அணுகலை வழங்கத் தவறியமை ஆகிய காரணங்களுடன் தொடர்புடையதாகும்.

இந்த அபராதம் தொடர்பான ஐரோப்பிய ஆணைக்குழுவின் பதிவுக்கு, எலான் மஸ்க் அவதூறு என பதிலளித்ததும் குறிப்பிடத்தக்கது.