சிவராச அனோஜனுக்கு அரச மன்னிப்பு கோரி சவுதி அரேபியாவிற்கு ‘தமிழ் பேசும் மக்களின் அரசியல் பேரவை’ வேண்டுகோள்..!

கொழும்பு, 28 செப்டம்பர் 2026:

ஆறு தமிழ் பேசும் அரசியல் கட்சிகளைப் பிரதிநிதித்துவப்படுத்தும் ‘தமிழ் பேசும் மக்களின் அரசியல் பேரவை’, சவுதி அரேபியாவில் சிறையில் அடைக்கப்பட்டுள்ள இலங்கை இளைஞரான சிவரச அனோஜனுக்கு அரச மன்னிப்பு கோருவதில் அவசர மற்றும் மனிதாபிமான அடிப்படையிலான உதவியை வழங்குமாறு சவுதி அரேபிய இராச்சியத்திடம் வேண்டுகோள் விடுத்துள்ளது.

இலங்கையின் தேசிய மற்றும் சமூக ஊடகச் செய்திகள் மற்றும் பிற மூலங்கள் மூலம் அறியப்பட்ட தகவல்களின்படி, அனோஜனின் மேன்முறையீட்டை விசாரித்த உயர் நீதிமன்றம் அவரது ஆரம்பகால தண்டனையை அதிகரித்ததைத் தொடர்ந்து, அவர் மரண தண்டனையை எதிர்கொண்டுள்ளார்.

மதத்திற்கு எதிராக இழைக்கப்பட்டதாகக் கூறப்படும் ஒரு குற்றத்திற்காக, கீழ் நீதிமன்றத்தால் அவருக்கு முதலில் ஐந்து ஆண்டுகள் சிறைத்தண்டனையும் அபராதமும் விதிக்கப்பட்டிருந்தது.

சவுதி அரேபிய இராச்சியத்தின் மிக உயர்ந்த நீதிமன்றத்தில் இறுதி மேன்முறையீடு செய்வதற்கான வாய்ப்பு இருப்பதை உணர்ந்துள்ளதாக அரசியல் பேரவை தெரிவித்துள்ளது. அனோஜன் இலங்கையில் மிகவும் பின்தங்கிய சமூக மற்றும் பொருளாதாரப் பின்னணியைக் கொண்ட ஒரு புலம்பெயர் தொழிலாளி என்பதையும், அத்தகைய மேன்முறையீட்டைத் தொடர்வதற்கு அவரது குடும்பத்தின் பொருளாதார வசதிக்கு அப்பாற்பட்ட பெரும் சட்டச் செலவுகள் தேவைப்படும் என்பதையும் அது சுட்டிக்காட்டியுள்ளது.

குற்றத்தின் தன்மை, பின்பற்றப்பட்ட சட்ட மற்றும் இராஜதந்திர நடவடிக்கைகள் மற்றும் அனோஜனின் தற்போதைய நிலை உள்ளிட்ட வழக்கு தொடர்பான உறுதிப்படுத்தப்பட்ட தகவல்களை நாடாளுமன்றத்திலும் பொதுமக்களிடமும் சமர்ப்பிக்குமாறு இலங்கை அரசாங்கத்திடம் இந்த வேண்டுகோள் வலியுறுத்துகிறது.

அனோஜனின் நிரபராதித் தன்மையையும், அமைதியை விரும்பும் அவரது நிலையான குணாதிசயத்தையும் நடத்தையையும் பிரதிநிதிகள் கூட்டாக உறுதிப்படுத்தினர். தனது குடும்பம் மற்றும் சமூகத்திலிருந்து வெகு தொலைவில் வசிக்கும் ஒரு புலம்பெயர் தொழிலாளியாக, இலங்கையில் நிகழ்ந்த ஒரு விரும்பத்தகாத சூழ்நிலைக்கு அவர் உடனடியாக எதிர்வினையாற்றியிருக்கலாம் என்று அவர்கள் கூறினர்.

முக்கியமாக, ஃபேஸ்புக்கில் (Facebook) பதிவிட்ட கருத்தை அனோஜன் உடனடியாகத் திரும்பப் பெற்றார், அதை நீக்கினார் மற்றும் மன்னிப்பு கோரினார் என்று அந்த வேண்டுகோள் குறிப்பிடுகிறது. இஸ்லாம் மதத்தை அவமதிக்கும் அல்லது புண்படுத்தும் நோக்கத்துடன் அந்தக் கருத்தை வெளியிடுவது அவரது இயல்பு அல்ல என்று பிரதிநிதிகள் உறுதிப்படுத்தினர்.

இலங்கைக்கும் சவுதி அரேபியாவிற்கும் இடையிலான நீண்டகால சுமூகமான உறவை மேலும் வலியுறுத்தும் இந்த வேண்டுகோள், நாட்டின் அபிவிருத்திக்கு சவுதி அரேபியா வழங்கிய உதவிகளை இலங்கை மக்கள் பெரிதும் மதிக்கிறார்கள் என்பதையும் சுட்டிக்காட்டுகிறது. இது இஸ்லாமிய உலகில் சவூதி அரேபியாவின் வகிபாகத்தைக் குறிப்பிடுவதுடன், அந்நாடு இந்த வேண்டுகோளை அனுதாபத்துடனும் கருணையுடனும் பரிசீலிக்கும் என்ற நம்பிக்கையையும் வெளிப்படுத்துகிறது.

எனவே, சகிப்புத்தன்மை மற்றும் பரஸ்பர புரிதல் ஆகிய விழுமியங்களின் அடிப்படையில், அனோஜனை எவ்வகையான தண்டனையிலிருந்தும் விடுவித்து அவரது உயிரைக் காப்பாற்றுமாறு சவூதி அதிகாரிகளிடம் அரசியல் பேரவை மரியாதையுடன் வேண்டுகோள் விடுத்துள்ளது; அத்துடன், அவருக்கு ‘அரச மன்னிப்பு’ (Royal Clemency) வழங்குமாறும் சவூதி அரேபிய அரசாங்கத்தைக் கேட்டுக்கொண்டுள்ளது.

இக்கடிதத்தின் பிரதிகள் இலங்கை வெளிவிவகார அமைச்சர், கொழும்பிலுள்ள சவூதி அரேபியத் தூதரகத்தின் பதில் தூதரகத் தலைவர் மற்றும் ரியாத்திலுள்ள இலங்கைத் தூதுவர் ஆகியோருக்கு அனுப்பி வைக்கப்பட்டுள்ளன.

தமிழ் பேசும் மக்களின் அரசியல் பேரவையில் அங்கம் வகிக்கும் ஆறு கட்சிகள் (அகரவரிசைப்படி) பின்வருமாறு:

* அகில இலங்கை மக்கள் காங்கிரஸ் (ACMC)

* இலங்கைத் தொழிலாளர் காங்கிரஸ் (CWC)

* ஜனநாயகத் தமிழ் தேசியக் கூட்டமைப்பு (DTNA)

* இலங்கைத் தமிழரசுக் கட்சி (ITAK)

* சிறிலங்கா முஸ்லிம் காங்கிரஸ் (SLMC)

* தமிழ் முற்போக்குக் கூட்டணி (TPA)

சாணக்கியன் இராசமாணிக்கம் (நாடாளுமன்ற உறுப்பினர்)

ஒருங்கிணைப்பாளர்

தமிழ் பேசும் மக்களின் அரசியல் பேரவை