டெங்குநோயை கட்டுப்படுத்த விழிப்புணர்வும் தொடர் செயற்பாடுகளும் அவசியம்..!

ஆ.ஜென்சன் றொனால்ட். MSc.

மேற்பார்வை பொது சுகாதார பரிசோதகர்.

டெங்கு நோய் இன்று இலங்கையில் பொதுச் சுகாதாரத்திற்கு மிகப்பெரிய சவாலாக விளங்குகிறது. ஒவ்வொரு ஆண்டும் மழைக்காலங்களைத் தொடர்ந்து ஆயிரக்கணக்கானோர் டெங்கு நோயால் பாதிக்கப்படுகின்றனர். குழந்தைகள், இளைஞர்கள், கர்ப்பிணிகள், முதியவர்கள் என வயது வேறுபாடின்றி அனைவரையும் இது தாக்கக்கூடியது. சிலருக்கு சாதாரண காய்ச்சலாகக் காணப்பட்டாலும், சிலருக்கு உயிருக்கு ஆபத்தான டெங்கு இரத்தக்கசிவு காய்ச்சல் (Dengue Haemorrhagic Fever) அல்லது டெங்கு அதிர்ச்சி நிலை (Dengue Shock Syndrome) ஏற்படலாம்.

டெங்கு நோயைக் கட்டுப்படுத்துவதற்கான மிகச் சிறந்த ஆயுதம் மக்கள் விழிப்புணர்வு மற்றும் தொடர்ச்சியான நுளம்பு கட்டுப்பாட்டு நடவடிக்கைகளே ஆகும். சுகாதாரத் துறையினர் மட்டுமல்லாது, ஒவ்வொரு குடும்பமும், ஒவ்வொரு பாடசாலையும், ஒவ்வொரு அரச மற்றும் தனியார் நிறுவனமும், ஒவ்வொரு கிராமமும் இணைந்து செயல்பட்டால்தான் டெங்குவை வெற்றிகரமாகக் கட்டுப்படுத்த முடியும்.

டெங்கு என்றால் என்ன?

டெங்கு என்பது வைரசால் ஏற்படும் தொற்றுநோயாகும். இது ஒருவரிடமிருந்து இன்னொருவருக்கு நேரடியாகப் பரவுவதில்லை. டெங்கு வைரசைக் காவுகின்ற பெண் Aedes நுளம்பு மனிதனை கடிப்பதன் மூலமே நோய் பரவுகிறது.

உலகின் வெப்பமண்டல மற்றும் உபவெப்பமண்டல நாடுகளில் டெங்கு அதிகமாகக் காணப்படுகிறது. இலங்கை அவற்றில் முக்கியமான நாடுகளில் ஒன்றாகும்.

டெங்கு வைரசுகள்

டெங்கு நோயை ஏற்படுத்தும் வைரசிற்கு நான்கு முக்கிய வகைகள் உள்ளன.

* DENV-1

* DENV-2

* DENV-3

* DENV-4

ஒரு வகை வைரசால் நோய் ஏற்பட்டவர் அதே வகைக்கு எதிராக நீண்டகால நோய் எதிர்ப்பைப் பெறலாம். ஆனால் மற்ற மூன்று வகைகளாலும் மீண்டும் பாதிக்கப்படலாம். இரண்டாவது அல்லது அதற்குப் பிந்தைய தொற்றுகளில் தீவிர டெங்கு ஏற்படும் அபாயம் அதிகமாகும்.

வைரசு உடலில் செயற்படும் விதம்

டெங்கு நுளம்பு கடிக்கும்போது வைரசு தோலின் வழியாக உடலுக்குள் நுழைகிறது.

பின்னர்,

* வெள்ளையணுக்களில் பெருகுகிறது.

* இரத்தத்தின் மூலம் உடலெங்கும் பரவுகிறது.

* நோய் எதிர்ப்பு அமைப்பைத் தூண்டுகிறது.

* இரத்த நாளங்களின் சுவர்களை பாதிக்கிறது.

* இரத்த நாளங்களில் இருந்து திரவம் வெளியேறத் தொடங்குகிறது.

* இதனால் இரத்த அழுத்தம் குறையலாம்.

* குருதிச் சிறுதட்டுக்கள் (Platelets) குறையலாம்.

* கடுமையான நிலையில் இரத்தக்கசிவு மற்றும் அதிர்ச்சி நிலை ஏற்படலாம்.

டெங்குவின் அறிகுறிகள்

ஆரம்ப அறிகுறிகள்

* திடீர் அதிக காய்ச்சல்

* கடுமையான தலைவலி

* கண்களின் பின்னால் வலி

* உடல்வலி

* மூட்டுவலி

* தசைவலி

* வாந்தி

* உணவு விருப்பமின்மை

* தோலில் சிவப்பு புள்ளிகள

தீவிர டெங்கின் எச்சரிக்கை அறிகுறிகள்

காய்ச்சல் குறையும் காலத்தில் பின்வரும் அறிகுறிகள் மிகவும் ஆபத்தானவை.

* கடுமையான வயிற்றுவலி

* மீண்டும் மீண்டும் வாந்தி

* மூச்சுத்திணறல்

* கடும் சோர்வு

* அமைதியின்மை

* மூக்கில் அல்லது ஈறுகளில் இரத்தக்கசிவு

* கருப்பு நிற மலம்

* சிறுநீர் குறைதல்

* மயக்கம்

* கைகள் கால்கள் குளிர்தல்

இவை தோன்றினால் உடனடியாக வைத்தியசாலைக்கு செல்ல வேண்டும்.

வைத்திய உதவியின் முக்கியத்துவம்

டெங்கிற்கு வைரசைக் கொல்லும் தனிப்பட்ட மருந்து தற்போது இல்லை. ஆனால் சரியான நேரத்தில் வழங்கப்படும் ஆதரவுச் சிகிச்சை உயிரைக் காப்பாற்றுகிறது.

எனவே,

* காய்ச்சல் இரண்டு நாட்களுக்கு மேல் நீடித்தால்

* டெங்கு சந்தேகம் இருந்தால்(டெங்கு பரவல் நடைபெயும் பிரதேசத்தில் வசிப்போர் )

* எச்சரிக்கை அறிகுறிகள் இருந்தால்

உடனடியாக அரச வைத்தியசாலைக்கு செல்ல வேண்டும்.

குருதிப் பரிசோதனையின் அவசியம்

டெங்கு நோயாளிக்கு மருத்துவர் பரிந்துரைக்கும் குருதிப் பரிசோதனைகள் மிகவும் முக்கியமானவை.

அவற்றில்,

* Full Blood Count (FBC)

* Platelet Count

* NS 1 Ag

* IgG,

* IgM

ஆகிய பரிசோதனைகள் நோயின் முன்னேற்றத்தை மதிப்பிட உதவுகின்றன.

ஒருமுறை பரிசோதனை செய்தால் போதாது. தேவைக்கேற்ப மீண்டும் மீண்டும் பரிசோதனை செய்யப்பட வேண்டும்.

வீட்டில் காய்ச்சல் ஏற்பட்டதும் செய்ய வேண்டியவை

* உடனே ஓய்வெடுக்க வேண்டும்.

* அதிகளவு நீராகாரங்களை அருந்த வேண்டும்.

* ORS, கஞ்சி, சூப் போன்ற திரவ உணவுகள் எடுத்துக்கொள்ள வேண்டும்.

* மருத்துவர் ஆலோசனைப்படி Paracetamol மட்டும் பயன்படுத்த வேண்டும்.

* Aspirin, Ibuprofen, Diclofenac போன்ற மருந்துகளை மருத்துவர் ஆலோசனையின்றி பயன்படுத்தக் கூடாது.

* தினமும் மருத்துவர் பரிந்துரைக்கும் பரிசோதனைகளை மேற்கொள்ள வேண்டும்.

* நுளம்பு வலையின் கீழ் இருக்க வேண்டும்.

* நீளமான ஆடைகள் அணிய வேண்டும்.

* நுளம்பு விரட்டிகளைப் பயன்படுத்த வேண்டும்.

ஏன் வைத்தியசாலையில் அனுமதிக்கப்பட வேண்டும்?

டெங்கு நோயின் மிக ஆபத்தான காலம் காய்ச்சல் குறையும் நாட்களாகும்.

அந்த நேரத்தில்,

* இரத்த அழுத்தம் திடீரென குறையலாம்.

* உடலில் திரவ இழப்பு அதிகரிக்கலாம்.

* உயிருக்கு ஆபத்தான நிலை உருவாகலாம்.

வைத்தியசாலையில்,

* தொடர்ச்சியான கண்காணிப்பு

* இரத்தப் பரிசோதனை

* திரவ சிகிச்சை

* அவசர சிகிச்சை

உடனடியாக வழங்கப்படுவதால் உயிரிழப்பைத் தடுக்க முடிகிறது.

டெங்கு நுளம்பை அடையாளம் காணுவது எப்படி?

டெங்கு நோயைப் பரப்பும் Aedes நுளம்பின் உடல் கருப்பு நிறத்தில் இருக்கும்.

அதன்,

* கால்களில் வெள்ளை வரிகள்

* மார்புப் பகுதியில் வெள்ளை வடிவங்கள்

காணப்படும்.

இவை பகல் நேரத்தில் அதிகமாகக் கடிக்கும்.

காலை மற்றும் மாலை நேரங்களில் மிகவும் சுறுசுறுப்பாக இருக்கும்.

டெங்கு நுளம்பின் இரண்டு இனங்கள்

டெங்கு நோயைப் பரப்பும் முக்கிய இரண்டு இனங்கள்:

Aedes aegypti

* வீடுகளுக்குள் அதிகமாக வாழ்கிறது.

* மனிதர்களையே அதிகம் கடிக்கிறது.

* டெங்கு பரப்புவதில் முக்கிய பங்கு வகிக்கிறது.

Aedes albopictus

* வெளிப்புறச் சூழலில் அதிகம் வாழ்கிறது.

* மரப்பொந்துகள், புதர்கள் போன்ற இடங்களில் காணப்படும்.

* டெங்கு பரப்பும் திறன் இருந்தாலும் Aedes aegyptiயைவிட குறைவாக உள்ளது.

டெங்கு நுளம்பின் வாழ்க்கைச் சுழற்சி

நுளம்பு வளர்ச்சி நான்கு நிலைகளைக் கொண்டது.

1. முட்டை

2. குடம்பி (Larva)

3. கூட்டுப்புழு (Pupa)

4. நிறைவுடலி (Adult)

சாதாரணமாக 7–10 நாட்களுக்குள் முழுமையாக வளர்ச்சி பெறுகிறது.

டெங்கு நுளம்பின் முட்டையின் விசேட இயல்பு

டெங்கு நுளம்பின் முட்டைகள் மிகவும் விசேடமானவை.

* பல மாதங்கள் உலர்ந்த நிலையிலும் உயிருடன் இருக்கும்.

* மீண்டும் நீர் கிடைத்தவுடன் பொரியும்.

* சிறிய நீர்த்துளி கூட வளர்ச்சிக்கு போதுமானது.

இதனால் வெறும் தண்ணீரை காலி செய்வது மட்டும் போதாது. பாத்திரங்களை நன்றாகத் தேய்த்துக் கழுவ வேண்டும்.

டெங்கின் பாதிப்புகள்

டெங்கு நோயின் பாதிப்புகள் மூன்று நிலைகளாகக் கருதப்படுகின்றன.

* எச்சரிக்கை அறிகுறிகளற்ற டெங்கு

* எச்சரிக்கை அறிகுறிகளுடன் கூடிய டெங்கு

* தீவிர டெங்கு

மூன்றாவது நிலை உயிருக்கு ஆபத்தானது.

தினமும் 30 நிமிட டெங்கு கட்டுப்பாடு

ஒவ்வொரு குடும்பமும் வாரத்திற்கு ஒருமுறை மட்டுமல்ல, தினமும் குறைந்தது 30 நிமிடங்களாவது சுற்றுப்புறத்தைப் பரிசோதிக்க வேண்டும்.

செய்ய வேண்டியவை:

* தேவையற்ற பாத்திரங்களை அகற்றுதல்

* டயர்கள் அகற்றுதல்

* தேங்காய் ஓடுகள் அகற்றுதல்

* பூந்தொட்டித் தட்டுகள் சுத்தம் செய்தல்

* கூரையிலுள்ள நீரை அகற்றுதல்

* வடிகால்களைச் சுத்தப்படுத்துதல்

* நீர் சேமிப்புத் தொட்டிகளை மூடுதல்

* குளிர்சாதனத் தட்டுகளில் நீரை காலி செய்தல்

* மலர்க்கூடங்களைத் தேய்த்தல்

* குப்பைகளை சரியாக அகற்றுதல்

அலுவலகங்கள் மற்றும் பொது இடங்களில்

* வாராந்த ஆய்வு

* பொறுப்பாளர் நியமனம்

* டெங்கு பதிவேடு

* நுளம்பு பெருக்கிட வரைபடம்

* கழிவு முகாமைத்துவம்

* கட்டுமானத் தள ஆய்வு

* மழைநீர் தேங்காத சூழல்

ஆகியவை கட்டாயமாக நடைமுறைப்படுத்தப்பட வேண்டும்.

நோயாளிகளை அறிவிப்பதன் முக்கியத்துவம்

டெங்கு நோயாளியைச் சிகிச்சையளிக்கும் மருத்துவர் அல்லது சுகாதார நிறுவனம் உடனடியாக சம்பந்தப்பட்ட சுகாதார வைத்திய அதிகாரி (MOH) அலுவலகத்திற்கு அறிவிக்க வேண்டும்.

இதன் மூலம்,

* நோயாளியின் வீடு பார்வையிடப்படும்.

* நுளம்பு பெருக்கிடங்கள் கண்டறியப்படும்.

* அயலவர்கள் பரிசோதிக்கப்படுவர்.

* சுகாதாரக் கல்வி வழங்கப்படும்.

* நோய் மேலும் பரவாமல் தடுக்கப்படும்.

கிராமமட்ட டெங்கு கட்டுப்பாட்டுக் குழுவின் அவசியம்

ஒவ்வொரு கிராமத்திலும் செயற்படும் டெங்கு கட்டுப்பாட்டுக் குழு இருக்க வேண்டும்.

அதில்,

* கிராம அலுவலர்

* சுகாதார வைத்திய அதிகாரி அலுவலக பிரதிநிதி

* பொதுச் சுகாதார பரிசோதகர்

* அபிவிருத்தி உத்தியோகத்தர்

* பாடசாலை பிரதிநிதி

* சமயத் தலைவர்கள்

* இளைஞர் கழகங்கள்

* மகளிர் அமைப்புகள்

இணைந்து செயல்பட வேண்டும்.

நிறுவனங்களின் பொறுப்பு

அரச நிறுவனங்கள், தனியார் நிறுவனங்கள், தொழிற்சாலைகள், பாடசாலைகள், பல்கலைக்கழகங்கள், ஆலயங்கள், தேவாலயங்கள், பள்ளிவாசல்கள், வணிக நிலையங்கள் அனைத்தும் டெங்கு கட்டுப்பாட்டில் பொறுப்புணர்வுடன் செயல்பட வேண்டும்.

டெங்கு கட்டுப்பாடு சுகாதாரத் துறையின் மட்டும் கடமையல்ல; அது முழுச் சமூகத்தின் பொறுப்பாகும்.

அறிவு – திறன் – மனப்பாங்கு – நடைமுறை

டெங்கு கட்டுப்பாட்டில் வெற்றி பெற,

அறிவு வேண்டும்.

டெங்கு எப்படி பரவுகிறது என்பதை அறிய வேண்டும்.

திறன் வேண்டும்.

நுளம்பு பெருக்கிடங்களை அடையாளம் கண்டு அழிக்கத் தெரிந்திருக்க வேண்டும்.

மனப்பாங்கு வேண்டும்.

“இது என் பொறுப்பு” என்ற எண்ணம் உருவாக வேண்டும்.

நடைமுறைப்படுத்தல் வேண்டும்.

அறிந்ததை தினமும் செயல்படுத்த வேண்டும்.

எதிர்கால நவீன டெங்கு கட்டுப்பாட்டு முறைகள்

உலகின் பல நாடுகளில் டெங்கு கட்டுப்பாட்டிற்காக புதிய தொழில்நுட்பங்கள் பயன்படுத்தப்படுகின்றன.

டெங்கு தடுப்பூசி

சில நாடுகளில் குறிப்பிட்ட நிபந்தனைகளின் கீழ் டெங்கு தடுப்பூசிகள் பயன்படுத்தப்படுகின்றன. எதிர்காலத்தில் இலங்கையிலும் அறிவியல் ஆதாரங்களின் அடிப்படையில் பொருத்தமான தடுப்பூசி திட்டங்கள் விரிவுபடுத்தப்பட வாய்ப்பு உள்ளது.

வொல்பக்கியா (Wolbachia) தொழில்நுட்பம்

வொல்பக்கியா என்ற பயனுள்ள பக்டீரியா சில Aedes நுளம்புகளுக்குள் செலுத்தப்படுகிறது.

இதன் மூலம்,

* டெங்கு வைரசின் பெருக்கம் குறைகிறது.

* நுளம்புகளால் வைரசைப் பரப்பும் திறன் குறைகிறது.

* நீண்டகால டெங்கு கட்டுப்பாட்டிற்கு இது ஒரு நம்பிக்கையூட்டும் உயிரியல் முறையாகக் கருதப்படுகிறது.

இம்முறை உலகின் பல நாடுகளில் சோதனை மற்றும் நடைமுறைத் திட்டங்களாக வெற்றிகரமாகப் பயன்படுத்தப்பட்டு வருகிறது.

டெங்கு என்பது நுளம்பால் பரவும் ஒரு நோய் மட்டுமல்ல; அது சமூகத்தின் ஒழுங்கு, சுற்றுச்சூழல் சுத்தம், பொறுப்புணர்வு மற்றும் கூட்டுச் செயல்பாட்டை சோதிக்கும் ஒரு பொதுச் சுகாதாரச் சவாலாகும்.

ஒரு வீட்டில் உருவாகும் நுளம்பு முழுக் கிராமத்தையும் பாதிக்கக்கூடும். ஒரு குடும்பத்தின் அலட்சியம் பல குடும்பங்களின் உயிருக்கு ஆபத்தை ஏற்படுத்தக்கூடும். அதேபோல், ஒரு குடும்பத்தின் விழிப்புணர்வும் பொறுப்புணர்வும் முழுச் சமூகத்தையும் பாதுகாக்கும்.

எனவே, ஒவ்வொரு நாளும் குறைந்தது 30 நிமிடங்களாவது நமது வீடு, வளவு, பணியிடம் மற்றும் சுற்றுப்புறத்தை ஆய்வு செய்து நுளம்பு பெருக்கிடங்களை அழிப்போம். காய்ச்சல் ஏற்பட்டால் தாமதமின்றி வைத்தியரை அணுகுவோம். டெங்கு நோயாளிகளை உரிய முறையில் அறிவித்து, பொதுச் சுகாதார நடவடிக்கைகளுக்கு ஒத்துழைப்போம். கிராமமட்ட டெங்கு கட்டுப்பாட்டுக் குழுக்களை வலுப்படுத்துவோம். அரசாங்கம், சுகாதாரத் துறை, உள்ளூராட்சி மன்றங்கள், பாடசாலைகள், மத அமைப்புகள், ஊடகங்கள் மற்றும் பொதுமக்கள் அனைவரும் ஒருங்கிணைந்து செயல்பட்டால்தான் டெங்குவை வெற்றிகரமாகக் கட்டுப்படுத்த முடியும்.

“டெங்கு ஒழியும் நாள் என்பது நுளம்பு பெருக்கிடங்கள் ஒழியும் நாளே. அறிவும், ஒழுக்கமும், ஒற்றுமையும், தொடர்ச்சியான செயற்பாடுகளும் இணைந்தால் டெங்கு இல்லா இலங்கையை நாம் உருவாக்க முடியும்.”