இலங்கை போக்குவரத்து சபையின் (SLTB) பல தொழிற்சங்கங்கள் நான்கு கோரிக்கைகளை முன்வைத்து நேற்று (27-08) நள்ளிரவு முதல் வேலைநிறுத்தப் போராட்டத்தை ஆரம்பித்துள்ளன.
இலங்கை போக்குவரத்து சபை மற்றும் தனியார் பேருந்துகளுக்கான ஒருங்கிணைந்த பேருந்து நேர அட்டவணையை அமல்படுத்த தேசிய போக்குவரத்து ஆணையம் (NTC) எடுத்த முடிவுக்கு எதிர்ப்பு தெரிவித்து, மேலும் பல கோரிக்கைகளையும் முன்வைத்துள்ளதால் இந்த வேலைநிறுத்தம் நடத்தப்படுவதாக SLTB--யின் சமகி சேவை சங்கமய தலைவர் நிரோஷன் சம்பத் பிரேமரத்ன தெரிவித்துள்ளார்.
இதேபோல், அறிமுகப்படுத்தப்பட்ட ஒருங்கிணைந்த அட்டவணையில் பல சிக்கல்கள் இருப்பதாக இலங்கை தனியார் பேருந்து சங்கத் தலைவர் கெமுனு விஜேரத்ன குறிப்பிட்டுள்ளார்.
ஆனால், தேசிய போக்குவரத்து ஆணையத் தலைவர் பொறியாளர் பி.ஏ. சந்திரபால, அனைத்து தொடர்புடைய தரப்பினரின் கருத்துகளும் பரிசீலிக்கப்பட்ட பின்னரே ஒருங்கிணைந்த கால அட்டவணை தயாரிக்கப்பட்டது என விளக்கமளித்தார்.
இதற்கிடையில், போக்குவரத்து மற்றும் நெடுஞ்சாலைகள் துணை அமைச்சர் பிரசன்ன குணசேன, தொழிற்சங்கங்கள் முன்வைத்த பெரும்பாலான கோரிக்கைகள் ஏற்கனவே நிறைவேற்றப்பட்டுள்ளதால் வேலைநிறுத்தம் நியாயமற்றது என்று தெரிவித்தார்.
எனினும், வேலைநிறுத்தம் அறிவிக்கப்பட்டிருந்தபோதிலும், நள்ளிரவிலிருந்து புறக்கோட்டை மத்திய பேருந்து நிலையத்தில் இருந்து பேருந்துகள் வழக்கம்போல் சேவைகளைத் தொடர்ந்தன என்பது குறிப்பிடத்தக்கது
