ஊழல் மற்றும் லஞ்ச குற்றச்சாட்டுகள் விசாரணை ஆணைக்குழு (CIABOC) முன்னாள் அமைச்சர் பசில் ராஜபக்ஷ மீது ரூ.1.03 பில்லியனுக்கும் அதிகமான பொது நிதி முறைகேட்டில் ஈடுபட்டதாக குற்றச்சாட்டுகள் எழுந்துள்ளன.
இதனையடுத்து, 2010 முதல் 2015 வரை நடைபெற்றதாகக் கூறப்படும் இந்த முறைகேடுகள் குறித்து விசாரணை தொடங்கப்பட்டுள்ளது.
‘லஞ்சம், ஊழல் மற்றும் வீண்வினைக்கு எதிரான குடிமக்கள் சக்தி அமைப்பின்’ தலைவர் கமந்த துஷாரா, இந்த குற்றச்சாட்டுகளை அடிப்படையாகக் கொண்டு CIABOC--க்கு முறைப்பாடு செய்துள்ளார்.
அவர் தனது முறைப்பாட்டில்;, முன்னாள் ஜனாதிபதி மைத்திரிபால சிறிசேனவால் நியமிக்கப்பட்ட ‘கடுமையான மோசடி, ஊழல், அதிகார துஷ்பிரயோகம், அரசின் சொத்துகள் மற்றும் சலுகைகள் தொடர்பான விசாரணை ஆணைக்குழு’ (PRECIFAC) சமர்ப்பித்த இறுதி அறிக்கையில் இந்த விவரங்கள் தெளிவாக குறிப்பிடப்பட்டுள்ளன என தெரிவித்துள்ளார்.
அந்த அறிக்கையின் படி, 2010 ஜூன் 2 முதல் 2014 நவம்பர் 7 வரை பசில் ராஜபக்ஷ, ‘மக நெகுமா’ திட்ட நிதியில் இருந்து ரூ.155,451,612 செலவில் விமானப்படை விமானங்களை உள்ளூர் பயணங்களுக்கு பயன்படுத்தியுள்ளார்.
அதேபோல், ஜனாதிபதி செயல்மறை அலுவலகத்திற்குச் சொந்தமான 14 வாகனங்கள் — அதில் மூன்று ஆடம்பர வாகனங்கள் பாதுகாப்புக்காகவும், 11 பிற வாகனங்களும் — பயன்படுத்தப்பட்டதாகவும், இதனால் அரசுக்கு ரூ.612 மில்லியன் இழப்பு ஏற்பட்டதாகவும் முறைப்பாட்டில் குறிப்பிடப்பட்டுள்ளது.
மேலும், 2010 ஜனவரி 10 முதல் 2015 ஜனவரி 10 வரை 64 கடற்படை வீரர்கள் மற்றும் 84 இராணுவ வீரர்கள் அவரது தனிப்பட்ட பாதுகாப்பிற்காக நியமிக்கப்பட்டிருந்தனர்.
இவர்களின் சம்பளம் மற்றும் கொடுப்பனவுகளுக்காக ரூ.264,370,800 அரச நிதியில் இருந்து செலவிடப்பட்டதாக குற்றச்சாட்டு கூறுகிறது.
இந்த குற்றச்சாட்டுகளைப் பற்றிய அனைத்து விவரங்களும் PRECIFAC அறிக்கையில் தெளிவாக இடம்பெற்றுள்ளதாக கமந்த துஷாரா ஊடகங்களிடம் தெரிவித்துள்ளார்.
மேலும், இதில் தொடர்புடைய அனைத்து அதிகாரிகளையும் உள்ளடக்கி சட்ட நடவடிக்கை எடுக்க வேண்டும் என்றும் அவர் வலியுறுத்தியுள்ளார்.
அவரது முறைப்பாட்டிற்கு பதிலளித்து CIABOC குற்றச்சாட்டுகளை அடிப்படையாகக் கொண்டு விசாரணை ஆரம்பித்துள்ளதாக எழுத்துமூலமாக அறிவித்துள்ளது.
இதன் தொடர்ச்சியாக, துஷாரா நேற்று (4-11) CIABOC அலுவலகத்திற்குச் சென்று தன் வாக்குமூலத்தையும் சம்பந்தப்பட்ட ஆவணங்களையும் சமர்ப்பித்துள்ளார்.
