அரிசி விலைகளை குறைக்கும் திட்டம் தற்போது இல்லை என்று விவசாய கால்நடை, காணி; மற்றும் பாசன அமைச்சின் செயலாளர் டி.பி. விக்ரமசிங்க நேற்று தெரிவித்தார்.
‘அரிசிக்கான உச்ச விலை ஏற்கனவே நிர்ணயிக்கப்பட்டுள்ளது. தற்போது உள்ள விலைகள் குறைந்த நிலையில் இருப்பதால் அவற்றை மேலும் குறைக்கும் எண்ணம் இல்லை’ என்று அவர் கூறினார்.
சமீபத்திய அறுவடை காரணமாக சந்தையில் அரிசி இருப்புகள் அதிகரித்திருந்தாலும், மத்திய வங்கியின் தினசரி விலை அறிக்கைகளை 2023 செப்டம்பர் மாதத்துடனும் 2024 செப்டம்பர் மாதத்துடனும் ஒப்பிடுகையில், பல்வேறு வகை அரிசிகளின் விலைகள் பெரும்பாலும் நிலைத்திருந்தன.
தற்போது சம்பா அரிசி மொத்த சந்தையில் கிலோவுக்கு ரூ.238 என்றும், சில்லறை சந்தையில் ரூ.244 முதல் ரூ.250 வரை விற்பனை செய்யப்படுகிறது.
2023ஆம் ஆண்டில் இது மொத்த சந்தையில் ரூ.220, சில்லறையில் ரூ.213 முதல் ரூ.234 வரை விற்பனையாகியிருந்தது.
நாடு அரிசி இரண்டு ஆண்டுகளுக்கு முன் கிலோவுக்கு ரூ.197 முதல் ரூ.220 வரை விற்பனையாகியிருந்த நிலையில், தற்போது ரூ.203 முதல் ரூ.235 வரை விலை நிர்ணயிக்கப்பட்டுள்ளது.
வெள்ளை அரிசி 2023இல் ரூ.195 முதல் ரூ.210 வரை இருந்தது. தற்போது மொத்த மற்றும் சில்லறை சந்தைகளில் ரூ.197 முதல் ரூ.215 வரை விற்பனையாகிறது. சிவப்பு அரிசி 2023இல் ரூ.177 முதல் ரூ.197 வரை விலைப்பட்டிருந்த நிலையில், தற்போது ரூ.189 முதல் ரூ.220 வரை விற்கப்படுகிறது.
2024 டிசம்பரில் வெளியிடப்பட்ட சிறப்பு வர்த்தமானி அறிவிப்பின் மூலம் உள்நாட்டில் உற்பத்தி செய்யப்படும் அரிசிக்கு உச்ச விலை நிர்ணயம் செய்யப்பட்டிருந்தது.
அதன்படி, வெள்ளை மற்றும் சிவப்பு அரிசி மொத்த விலை கிலோவுக்கு ரூ.215 என்றும், சில்லறை விலை ரூ.230 என்றும் நிர்ணயிக்கப்பட்டது.
ஆவியில் வேகவைக்கப்பட்ட வெள்ளை சிவப்பு சம்பா அரிசியின் உச்ச சில்லறை விலை ரூ.240 என்றும், மொத்த விலை ரூ.235 என்றும் தீர்மானிக்கப்பட்டது.
கீரிசம்பா அரிசியின் உச்ச மொத்த விலை ரூ.255 என்றும், உச்ச சில்லறை விலை ரூ.260 என்றும் நிர்ணயிக்கப்பட்டது.
இதன்படி, குறிப்பிடப்பட்ட உச்ச விலையை மீறி அரிசி விற்பனை, விநியோகம், விற்பனைக்கு முன்வைப்பு அல்லது காட்சிப்படுத்தல் தடை செய்யப்பட்டுள்ளதாக வர்த்தமானி அறிவிப்பு வலியுறுத்துகிறது.
